Kralendijk.- Djaluna último, e federashon di beisbòl i sòftbòl Boneriano(FBSB) ku ta den formashon, tabatin un konferensia di prensa kaminda nan a introdusí e deporte di Baseball 5 via di e proyekto Bonaire Tour. E proyekto Bonaire Tour ta bini for di e proyekto di e bònt hulandes di beisbòl i sòftbòl(KNBSB) ku ta karga e nòmber City Tour. E meta di Bonaire Tour ta kana huntu ku e meta di e programa di desaroyo, kual ta pa laga mas tantu hende ku ta posibel ta den moveshon, pa sòru asin’ei por tin un isla di Boneiru mas saludabel.

Esaki a pone ku FBSB konhuntamente ku e entidat di deporte di Boneiru INDEBON, a kuminsá introdusí e deporte di Baseball 5 na skolnan rònt e isla. E intenshon ta pa algun siman e muchanan práktika e deporte aki durante nan orario di skol i tambe na algun okashon despues di skol, pa despues forma parti di un kompetensia eskolar den e deporte.

Tambe FBSB lo hasi introdukshon di Baseball 5 den barionan, kaminda durante aña lo organisá un dia di kompetensia den diferente barionan aki na Boneiru. Tur hende, for di mucha te ku hende grandi, ta bai ta bon biní pa partisipá den e evento aki den nan bario.

E intenshon ta pa den futuro organisá un kampeonato lokal di Baseball 5 pero pa despues tambe trata na organisá e promé kampeonato di den Karibe pa ku e deporte aki. Ya kaba FBSB ta den kombersashon ku Special Olympic Bonaire, pa asina e deporte aki tambe keda rekonosé den Special Olympics i asin’ei personanan spesial tambe por práktika e deporte di Baseball 5.

Por último FBSB kier a gradisí INDEBON, KNBSB i Plaza Beach & Dive Resort pa nan sosten den e proyekto aki i ta pidi e pueblo boneriano pa keda pendiente pa mas di Baseball 5 ku ta bai resoná riba nos dushi isla.